🪔 मुक्ताईनगरीत : मोठी देवी जगदंबा मातेची विसर्जन मिरवणूक उत्साहात संपन्न!
YouTube channel Video Click Here
भाविकांच्या गर्दीत ‘शांती उत्सव’ भक्तिमय वातावरणात पार पडला
संपूर्ण देशात केवळ खामगाव येथे साजरा केला जाणारा मोठी देवी जगदंबा मातेचा उत्सव यंदा प्रथमच जळगाव जिल्ह्यातील संत मुक्ताई साहेबांच्या पावन भूमीवर साजरा करण्यात आला. कोजागिरी पौर्णिमेच्या मुहूर्तावर (दि. ६ ऑक्टोबर २०२५) सुरू झालेला हा उत्सव अकरा दिवस भक्ती, संस्कृती आणि उत्साहाने साजरा होत राहिला. या भव्य उत्सवाची सांगता आणि देवीची विसर्जन मिरवणूक गुरुवारी (दि. १६ ऑक्टोबर २०२५) भक्तांच्या जयजयकारात पार पडली.
🌸 अकरा दिवस चालला भक्तिमय उत्सव
कोजागिरी पौर्णिमेच्या शुभदिनी जगदंबा म्हणजेच ‘मोठी देवी’ची मूर्ती मुक्ताईनगर येथील संताजीनगर येथे विधिवत प्राणप्रतिष्ठा करून स्थापण्यात आली. या दिवसापासून पुढील अकरा दिवस विविध धार्मिक कार्यक्रम, महिला भजनमंडळांचे सादरीकरण, आरत्या आणि सांस्कृतिक कार्यक्रमांनी शहर भक्तिमय झाले होते.
🔴 ‘शांती उत्सव’चे वेगळेपण
या उत्सवाला ‘शांती उत्सव’ असे संबोधले जाते. विजयादशमीला असुरांचा संहार केल्यानंतर देवीचा चेहरा क्रोधामुळे लाल झाल्याचे मानले जाते. देवीला शांत करण्यासाठी या कालावधीत विशेष पूजा-अर्चना केल्या जातात. याच भावनेतून या उत्सवाला ‘शांती उत्सव’ म्हणतात. ही प्रथा खामगाव येथे १९०८ पासून अविरत सुरू असून, आता मुक्ताईनगरमध्येही त्याच परंपरेचा वारसा पुढे चालविण्यात आला आहे.
🕉️ देवीचा इतिहास आणि मुक्ताईनगरमधील प्रारंभ
ही जागृत देवी तेलंगणा राज्यातील निजामाबाद जिल्ह्यातील बोधन गावातील असून, तेथूनच तिची मूर्ती खामगावात आणून हा उत्सव सुरू झाला होता. खामगाव व बुलढाणा जिल्ह्यातील माहेर आणि मुक्ताईनगरमधील सासर असलेल्या काही श्रद्धाळू महिला भगिनींनी यंदा श्री जगदंबा सार्वजनिक उत्सव मंडळ, मुक्ताईनगर च्या वतीने हा आगळावेगळा उपक्रम सुरू केला. भाविकांच्या वाढत्या प्रतिसादामुळे पुढील काही वर्षांत हा उत्सव अधिक भव्य स्वरूप धारण करेल, असा विश्वास आयोजकांनी व्यक्त केला आहे.
🌼 विसर्जन मिरवणुकीची झगमगती शोभा
महिला भगिनींनी नववारी आणि पैठणी नेसून देवीची आरती केली, तर तरुणाईने ढोल-ताशा, लेझीम, आणि गजरांच्या तालावर नृत्य करून मिरवणुकीत रंग भरला.
“जय जगदंबे!”, “माता राणी की जय!” अशा घोषणांनी मुक्ताईनगरचे वातावरण भक्तिभावाने दुमदुमून गेले. अखेर देवीच्या विसर्जनाने या ‘शांती उत्सवा’चा समारोप भक्ती, आनंद आणि समाधानाच्या वातावरणात झाला.
🌺 श्रद्धेचा उत्सव — मुक्ताईनगरीचे नवे आकर्षण
या उत्सवामुळे मुक्ताईनगर शहरात एक वेगळाच चैतन्य आणि भक्तीचा माहोल निर्माण झाला होता.
भाविकांचे म्हणणे आहे की, “जगदंबा माता नवसाला पावणारी आहे, आणि तिच्या कृपेने मुक्ताईनगर शहरात दरवर्षी भक्तिभावाचा नवा सोहळा उमलणार आहे.”
