आदिशक्ती श्री. संत मुक्ताई ७२५ व्या अंतर्धान सांगता सोहळ्यासाठी

आदिशक्ती श्री. संत मुक्ताई ७२५ व्या अंतर्धान सांगता सोहळ्यासाठी श्री पांडुरंगराय पालखी सोहळ्याचे मुक्ताईनगरकडे प्रस्थान

पंढरपूर दि . २३ – टाळ, मृदुंगाचा गजर व विठ्ठलनामाचा जयघोष करीत श्री संत मुक्ताबाईंच्या ७२५ व्या अंतर्धान समाधी सोहळ्यास उपस्थित राहण्यासाठी पंढरीनिवासी श्री अनंतकोटी ब्रह्मांडनायक श्री पांडुरंगराय पादुका पालखी सोहळ्याने सोमवारी श्री क्षेत्र मुक्ताईनगरकडे प्रस्थान ठेवले .

सोमवारी सकाळी ७ वाजता श्री पांडूरंगराय पादुकांची विधीवत पूजा व आरती श्री विठ्ठल रुक्मिणी मंदिरे समितीचे विश्वस्थ ज्ञानेश्वर महाराज जळगावकर व शकुंतला नडगीरे यांच्या हस्ते करण्यात आली . यावेळी श्री संत मुक्ताबाई संस्थानचे अध्यक्ष रवींद्र पाटील , पालखी सोहळा प्रमुख रवींद्र महाराज हरणे , सूर्यकांत भिसे , मंदिर समितीचे व्यवस्थापक बालाजी पुदलवाड , नित्य उपचार विभाग प्रमुख अतुल बक्षी , प्रतिभा पाटील , सम्राट पाटील , श्रध्दा पाटील , मीना पाटील यांच्यासह विठ्ठलभक्त उपस्थित होते .
हा सोहळा करमाळा , अहमदनगर मार्गे पहिल्या मुक्कामासाठी सायंकाळी औरंगाबाद मुक्कामी पोहोचेला . गारखेडा – औरंगाबाद येथील श्री गजानन महाराज मंदिरात सोहळा मुक्कामी राहिला .
दि. २४ मे मंगळवारी रोजी भुसावळ येथे विठ्ठल मंदिर वार्ड येथे मुक्काम व दि. २५ मे बुधवारी रोजी श्री क्षेत्र मुक्ताईनगर येथे आगमन, दिंडी व दर्शन सोहळा , दि. २६ मे गुरुवारी जुनी कोथळी ते नवीन मुक्ताई मंदिर पालखी व दिंडी सोहळा, दि. २७ मे शुक्रवारी द्वादश पारणे, नैवेद्य व सोहळ्याचा परतीचा प्रवास सुरु होइल . सोहळा चिखली येथे मुक्काम पोहोचेल . दि. २८ मे शनिवारी बीड येथे मुक्काम, दि. २९ मे रविवारी स्वस्थानी पंढरपूर येथे पालखी सोहळ्याची सांगता अशा स्वरूपात श्री विठ्ठल रुक्मिणी मंदिरे समिती, पंढरपूर तर्फे पालखी सोहळ्याची रूपरेषा तयार करण्यात आलेली आहे.

श्री पांडुरंगराय व संतांच्या भेटी
श्री पांडुरंगराय पादुका सोहळा दि . २४ मे रोजी दुपारी जामनेर जि जळगाव येथे पोहोचेल . येथे श्री पांडुरंगराय व श्री क्षेत्र पंढरपूर येथून निघालेल्या संत नामदेव महाराज पादुका भेटीचा सोहळा होइल तर सायंकाळी ६ वाजता श्री क्षेत्र त्र्यंबकेश्वर येथून निघालेल्या श्री संत निवृत्तीनाथ महाराज पादुकांचा भेटीचा सोहळा होइल . संत मुक्ताबाई महाराजांचा हा ७२५ वा अंतर्धान सोहळा असल्याने कौडण्यपूरहून माता रुक्मिणी , आळंदीहून संत ज्ञानेश्वर महाराज व सासवडहून संत सोपानदेव यांच्या पादुका व विश्वस्थ मंडळ सोहळ्यासाठी उपस्थित राहिल अशी माहिती श्री संत मुक्ताबाई संस्थानचे अध्यक्ष रवींद्र पाटील यांनी दिली .