किर्तनकारावर काळाची झडप, टँकरच्या भीषण धडकेत मृत्यू
कीर्तनाची सेवा आटपून बहिणीकडे जाणाऱ्या किर्तनकाराचे अपघातात दुर्दैवी निधन. जळगावदरम्यान सेंट सा शाळेजवळ गॅस च्या टँकरने भीषण धडक दिल्याने किर्तनकार कैलास प्रकाश कोळी (वय २२, रा. खर्डी, ता. चोपडा) हे टँकरखाली अडकून त्यांचा दुर्दैवी मृत्यू झाला.
याबाबत पोलीस सूत्रांकडून मिळालेल्या माहिती नुसार सविस्तर असे की, चोपडा तालुक्यातील प्रसिद्ध किर्तनकार हरी भक्त पारायण कैलास कोळी हे चोपडा तालुक्यातील खर्डी येथे आपल्या कुटुंबासह वास्तव्यास होते. शनिवार २३ डिसेंबर २०२३ रोजी पाचोरा येथील कीर्तन सेवा आटपून ते रात्री ११ वाजता दुचाकीने चोपडा येथे येत असताना जळगाव शहराजवळ असलेल्या शिरसोली रस्त्यावर रात्री १२.३० वाजता गॅसच्या टँकरने त्यांच्या दुचाकीला भीषण धडक दिली. या भीषण अपघातात त्यांचा उजवा पाय कापला गेला.
दरम्यान नागरिकांसह आरोग्यदूत शिवाजी पाटील यांनी त्यांना शासकीय वैद्यकीय महाविद्यालय व रुग्णालयात उपचारासाठी तातडीने दाखल केले. तेथे उपचार सुरु असताना रवीवारी पहाटे कैलास कोळी यांचे दुखद निधन झाले. यावेळी नातेवाईकांनी शासकीय वैद्यकीय महाविद्यालयात प्रचंड आक्रोश केला. रविवारी २४ डिसेंबर रोजी सकाळी १० वाजता शवविच्छेदन करून मृतदेह नातेवाईकांच्या ताब्यात देण्यात आला आहे. त्यांच्या पश्चात आई-वडील, भाऊ, दोन विवाहित बहीण असा परिवार आहे. याप्रकरणी एमआयडीसी पोलीस स्टेशनला घटनेची नोंद करण्यात आली आहे.
