मुक्ताईनगरमध्ये अनेक भागात अतिवृष्टीने घरांची पडझड, तातडीने पंचनामे करून नुकसान भरपाई देण्याची शिवसेनेची मागणी
मुक्ताईनगर शहरात बुधवार, १७ सप्टेंबर २०२५ रोजी पहाटे ३ ते ४ वाजण्याच्या सुमारास विजांच्या कडकडाटासह आणि सोसाट्याच्या वाऱ्यासह झालेल्या मुसळधार अतिवृष्टीसदृश्य पावसामुळे शहराचे जनजीवन विस्कळीत झाले. या अकाली व विक्रमी पावसामुळे शहरात मोठ्या प्रमाणात नुकसान झाले असून, अनेक भागांत घरांची पडझड झाली आहे. यामुळे नागरिकांचे मोठे नुकसान झाले असून, ते हवालदिल झाले आहेत.
शिवसेनेचे तहसीलदारांना निवेदन
या नैसर्गिक आपत्तीमुळे झालेल्या नुकसानीची पाहणी करून, तातडीने पंचनामे करून नागरिकांना नुकसान भरपाई मिळवून देण्यासाठी शिवसेनेने पुढाकार घेतला आहे. शिवसेनेच्या वतीने शहरातील तहसीलदारांना एक निवेदन सादर करण्यात आले आहे. या निवेदनात प्रशासनाने या नुकसानीची तात्काळ दखल घेऊन, युद्ध पातळीवर पंचनामे करावेत आणि संबंधितांना लवकरात लवकर नुकसान भरपाई मिळावी, अशी मागणी करण्यात आली आहे.
उपस्थित पदाधिकारी
यावेळी शिवसेना शहर प्रमुख गणेश टोंगे, अल्पसंख्यांक कार्यकारी अध्यक्ष अफसर खान, शिवसेना जिल्हा उपसमन्वयक आरिफ आझाद, शहर संघटक वसंत भलभले, सोशल मीडिया तालुकाप्रमुख पप्पू मराठे, संतोष माळी, राजेंद्र तळेले, दीपक कोळी, नगरसेवक पियुष मोरे यांच्यासह अनेक कार्यकर्ते उपस्थित होते.
यावेळी बोलताना शिवसेना पदाधिकाऱ्यांनी, “या नैसर्गिक संकटात शासन नागरिकांच्या पाठीशी उभे राहील अशी अपेक्षा आहे. प्रशासनाने त्वरित कार्यवाही करून पीडितांना दिलासा द्यावा,” असे आवाहन केले. या मागणीवर प्रशासन काय पावले उचलते, याकडे आता सर्वांचे लक्ष लागून आहे.
