धक्कादायक! मुक्ताईनगरमध्ये 6 वर्षीय चिमुरडीच्या अपहरणाचा प्रयत्न; दोघे अल्पवयीन आरोपी बालसुधारगृहात; अफवांपासून सावध राहण्याचे पोलिसांचे आवाहन
मुक्ताईनगर | 18 मे 2025 | प्रतिनिधी – मुक्ताई वार्ता
मुक्ताईनगर शहरात एका चिमुकलीच्या अपहरणाचा धक्कादायक प्रकार समोर आला आहे. दोन अल्पवयीन मुलांनी 6 वर्षीय दियाच्या अपहरणाचा प्रयत्न केला. नागरिकांच्या सतर्कतेमुळे वेळेवर ही घटना उधळून लावण्यात यश आले असून, दोन्ही आरोपींना पकडण्यात आले आहे. या प्रकरणी मुक्ताईनगर पोलिस ठाण्यात तक्रार दाखल करण्यात आली असून पुढील कायदेशीर कारवाई सुरू आहे.
ठळक मुद्दे:
घरासमोरून चिमुरडीचे अपहरण करण्याचा प्रयत्न
दुर्दैवाने लैंगिक छळाच्या उद्देशाचा संशय
सतर्क नागरिकांनी आरोपींना पकडून पोलिसांच्या ताब्यात दिले
दोन्ही आरोपी अल्पवयीन; बालसुधारगृहात दाखल
पोलिसांनी अफवांपासून सावध राहण्याचे केले आवाहन
घटनेचा तपशील:
तक्रारदार योगेश दिनेश बेलदार (रा. जिजाऊ नगर, मुक्ताईनगर) हे महावितरण कार्यालयात नोकरीस असून, दिनांक 18 मे रोजी रात्री 8.15 वाजता ही घटना घडली. त्यांच्या मोठ्या मुलीचा आवाज ऐकून त्यांनी घराबाहेर धाव घेतली असता, दोन काळसर रंगाच्या मुलांपैकी एकाने त्यांच्या मुलीला उचलून नेण्याचा प्रयत्न करताना दिसला. योगेश बेलदार यांच्या हाकेला प्रतिसाद देत तेथील नागरिकांनी तात्काळ पाठलाग करून दोघांना पकडले.
आरोपींची नावे रमेश सिताराम शिंदे (वय 16) आणि शुभम माणिकराव बाबर (वय 12) अशी असून, ते श्रीराम नगर, भिलवाडा, मुक्ताईनगरचे रहिवासी आहेत. या दोघांवर लैंगिक छळाच्या उद्देशाने चिमुरडीचे अपहरण करण्याचा संशय असून, तक्रार दाखल करून पोलिसांनी पुढील तपास सुरू केला आहे.
पोलिस निरीक्षकांचा महत्त्वाचा इशारा:
मुक्ताई वार्ताने याबाबत मुक्ताईनगर पोलीस ठाण्याचे निरीक्षक नागेश मोहिते यांच्याशी संवाद साधला असता, त्यांनी सांगितले की,
“दोन्ही आरोपी अल्पवयीन असल्यामुळे त्यांना जळगाव येथील बालसुधारगृहात दाखल करण्यात आले आहे. या घटनेनंतर समाजमाध्यमांवर व परिसरात लहान मुले पळविण्याचे रॅकेट सुरु असल्याच्या अफवा पसरत आहेत. याबाबत नागरिकांनी कोणत्याही अफवांवर विश्वास ठेवू नये. काहीही संशयास्पद वाटल्यास तात्काळ पोलिसांशी संपर्क साधावा.”
जनतेसाठी जागरूकतेचा संदेश:
ही घटना समाजासाठी गंभीर इशारा देणारी आहे. लहान मुलांना घराबाहेर एकटे सोडणे धोकादायक ठरू शकते. यासाठी पालकांनी अधिक सतर्क राहणे आवश्यक आहे. समाजातील नागरिकांनी पोलिसांशी सहकार्य करून अशा घटनांना रोखण्यासाठी सजग भूमिका घ्यावी.
- मुक्ताई वार्ताकडून विनंती – अफवांवर विश्वास न ठेवता सत्याची शहानिशा करणे आणि कोणतीही संशयास्पद हालचाल आढळल्यास जवळच्या पोलीस ठाण्याशी त्वरित संपर्क साधावा.
