अमरावती, 3 एप्रिल (हिं.स.)
राज्याचे महसूल मंत्री तसेच अमरावती जिल्ह्याचे पालकमंत्री चंद्रशेखर बावनकुळे यांच्या नावाने एका अज्ञात व्यक्तीने बनावट लेटरहेड व त्यांची बनावट स्वाक्षरी करून एका वरिष्ठ लिपिकावर कारवाई करण्याचे पत्र जिल्हाधिकाऱ्यांना पाठवल्याचा धक्कादायक प्रकार उघडकीस आला आहे.जिल्हाधिकारी सौरभ कटियार यांनी हे पत्र तपासले, त्यातील मजकुरावरून त्यांना संशय आला. लेटरहेडसह पालकमंत्री व महसूल मंत्र्यांची सही देखील बनावट असल्याचे त्यांच्या लक्षात आले. त्यातून हा धक्कादायक प्रकार उघडकीस आला.
या प्रकरणी संबंधित अज्ञात व्यक्तीच्या विरोधात पोलीस आयुक्त कार्यालयात तक्रार दाखल करण्यात आली. गाडगेनगर पोलिसांनी गुन्हा नोंदवून तपास सुरू केला आहे. एका अज्ञात व्यक्तीने महसूल मंत्री तथा पालकमंत्री चंद्रशेखर बावनकुळे यांच्या नावाने अमरावतीच्या जिल्हाधिकाऱ्यांना एक पत्र पाठवले. मोर्शी येथील एका वरिष्ठ लिपिकावर कारवाई करण्यासंदर्भात हे पत्र आहे. हे पत्र बनावट स्वाक्षरीसह लेटरहेडवर दिले.टपालाद्वारे हे बनावट पत्र पाठवण्यात आले होते.
हा प्रकार समोर येताच पालकमंत्री चंद्रशेखर बावनकुळे यांचे विशेष कार्यकारी अधिकारी योगेश कोठेकर यांनी तत्काळ पोलीस आयुक्त नवीनचंद्र रेड्डी यांच्याशी संपर्क साधून सविस्तर चर्चा केली आणि लेटरहेड व त्यावरील स्वाक्षरी बनावट असल्याचे स्पष्ट केले. संबंधित अज्ञात व्यक्तीविरुद्ध गुन्हा नोंदवून त्याचा शोध घेण्याचे आदेश यावेळी पोलिस आयुक्त नवीनचंद्र रेड्डी यांनी दिले. हे बनावट पत्र १९ मार्च रोजी जिल्हाधिकारी कार्यालयाला प्राप्त झाले होते. त्यात वरूड नगर पालिकेतील एका लिपिकावर कारवाई करण्याचे सांगण्यात आले आहे. या लिपिकाने वरिष्ठांच्या वरदहस्ताने जिल्हाधिकारी कार्यालयाच्या नगर पालिका विभागात प्रतिनियुक्तीवर परस्पर नेमणूक मिळवली, असा उल्लेख त्यात होता.
