मुक्ताईनगर: २ हजार लीटर डिझेल चोरी प्रकरण; मोठे रॅकेट सक्रीय असल्याची चर्चा, पोलिसांच्या भूमिकेवर प्रश्नचिन्ह!
मुक्ताईनगर: २ हजार लीटर डिझेल चोरी प्रकरण; मोठे रॅकेट सक्रीय असल्याची चर्चा, पोलिसांच्या भूमिकेवर प्रश्नचिन्ह!
मुक्ताईनगर, जि. जळगाव: मुक्ताईनगर तालुक्यात सुरू असलेल्या इंदौर-छत्रपती संभाजीनगर महामार्ग तसेच अन्य विकास प्रकल्पांच्या कामांमुळे गौण खनिज वाहतूक करणाऱ्या अवजड वाहनांची वर्दळ मोठ्या प्रमाणात वाढली आहे. याच अनुषंगाने, इंधनाच्या वाढत्या मागणीमुळे आणि किमतीमुळे परिसरात डिझेल चोरी व अवैध बायोडिझेल विक्रीचे मोठे रॅकेट सक्रिय झाल्याची जोरदार चर्चा आहे.
या गंभीर प्रकरणाचाच एक भाग म्हणून, दिनांक ३ ऑक्टोबर २०२५ रोजी रात्रीच्या सुमारास हरताळा फाट्यावरील चंद्रोदय पेट्रोल व डिझेल पंपावरून सुमारे २,००० (दोन हजार) लीटर डिझेलची चोरी झाल्याची खळबळजनक घटना उघडकीस आली आहे. या प्रकरणी पंपाचे मालक यांनी तातडीने मुक्ताईनगर पोलीस ठाण्यात फिर्याद देण्यासाठी धाव घेतली.
चोरीची पद्धत व पोलिसांचा संशयास्पद विलंब
प्राप्त माहितीनुसार, चोरीसाठी प्रत्येकी २०० लीटर क्षमतेचे सुमारे १० नवीन बॅरल ट्रॅक्टरमध्ये भरण्यात आले आणि मालकाच्या अपरोक्ष हे डिझेल चोरट्या मार्गाने विक्री करण्यात आले.
या प्रकरणी पोलिसांनी भोकरी येथील ट्रॅक्टर चालक व भाडेकरारावर बोलावणाऱ्या व्यक्तीला चौकशीसाठी ताब्यात घेतले. रात्री उशिरापर्यंत ठाणे अंमलदारांकडून चौकशी सुरू होती. मात्र, रात्री १२ वाजेपर्यंत देखील चोरीचा मुद्दामाल, ट्रॅक्टर आणि ज्या वाहनात डिझेल विकले गेले ते वाहन जप्त करण्यात आले नव्हते, तसेच गुन्हा दाखल करण्यात आला नव्हता. पत्रकारांनी विचारणा केल्यानंतर, पुढील कारवाई दिनांक ४ ऑक्टोबर २०२५ रोजी सकाळी १० वाजता करण्यात येईल, असे पोलिसांकडून सांगण्यात आले.
लाखोंच्या चोरीत ‘सेटलमेंट’चा संशय?
पंपाचे मालक स्वतः पोलीस ठाण्यात हजर असताना, २००० लीटर डिझेल चोरी म्हणजे लाखो रुपयांचा आर्थिक गुन्हा असतानाही, गुन्हा दाखल करण्यास करण्यात आलेल्या या अस्वाभाविक विलंबाबद्दल गंभीर चर्चा सुरू आहेत.
- गुन्हा दाखल करण्यास कुणाच्या ‘इशाऱ्यावर’ टाळाटाळ केली जात आहे?
- या मोठ्या चोरी प्रकरणात ‘सेटलमेंट’ (तडजोड) करण्याचे प्रयत्न सुरू नाहीत ना?
असे प्रश्न उपस्थित केले जात आहेत, ज्यामुळे मुक्ताईनगर पोलिसांच्या भूमिकेवर मोठे प्रश्नचिन्ह निर्माण झाले आहे.
‘बायोडिझेल’ विक्रीच्या रॅकेटचा संशय
या प्रकरणी आणखी एक गंभीर शक्यता वर्तवली जात आहे. मुक्ताईनगर तालुक्यात बायोडिझेलची अवैध विक्री मोठ्या प्रमाणात होत असल्याची चर्चा आहे. पोलिसांकडून गुन्हा दाखल करण्यास करण्यात आलेली टाळाटाळ पाहता, चोरी झालेले हे पेट्रोल पंपावरील ओरिजनल डिझेल होते की, अवैध मार्गाने विक्रीसाठी ठेवलेले बायोडिझेल होते, याबद्दल संशय निर्माण झाला आहे.
- पंपाच्या मालकांनी रात्री उशिरा गुन्हा दाखल न करता काढता पाय का घेतला?
सकाळी १० वाजता गुन्हा दाखल झाल्यावरच डिझेलचा प्रकार स्पष्ट होईल, अशी अपेक्षा व्यक्त होत आहे.
मास्टर माईंड कोण? कठोर कारवाईची मागणी
या परिसरात काही डंपर मालकांना सर्रासपणे ‘६,००० लीटर, ८,००० लीटर डिझेल कमी भावात पाहिजे का?’ अशा फोनाफोनी सुरू असल्याची माहिती आहे. यामुळे डिझेल चोरी किंवा अवैध बायोडिझेल विक्रीचे हे मोठे गोरखधंदे राजरोसपणे सुरू असल्याचे स्पष्ट होते. इतक्या मोठ्या प्रमाणावर इंधनाची खरेदी-विक्री सुरू असेल, तर यामागे मोठे रॅकेट आणि त्याला राजकीय वरदहस्त असल्याची शक्यता बळावते.
- या गैरप्रकारामागचा ‘मास्टर माईंड’ (मुख्य सूत्रधार) कोण आहे?
- महसूल आणि पोलीस प्रशासनाकडून यावर कठोर कारवाई का केली जात नाही?
असे एक ना अनेक सवाल उपस्थित होत असून, या संपूर्ण प्रकरणाची तातडीने व निष्पक्षपातीपणे चौकशी करून, दोषींवर कठोर कायदेशीर कारवाई करण्याची मागणी जोर धरू लागली आहे.
