संत मुक्ताई साहेबांचा जन्मोत्सव सोहळा पारायण व पुष्पवृष्टीने साजरा !

संत मुक्ताई संस्थान व श्री.स्वामी समर्थ सेवेकरी परिवारातर्फे आयोजित कार्यक्रमात हजारो भाविकांनी केले श्री दुर्गा सप्तशती , संत मुक्ताई विजय ग्रंथाचे पारायण व पुष्पवृष्टीने केला मुक्ताई साहेबांचा जागर

मुक्ताईनगर : हिंदू धर्मातील अतिशय महत्त्वाचा व प्रत्येक कुटुंबासाठी अतिशय श्रद्धेचा असलेला नवत्रोत्सव सण उत्सवास आज दि.२२ सप्टेंबर सोमवार पासून सुरुवात झालेली असून या परंपरेला आणखी एक ऐतेहासिक विषय जोडलेला असून संत परंपरेतील संत ज्ञानेश्वरादी चौघे भावंडात अतिशय लडिवाळ भगिनी असलेल्या परंतु तितक्याच मोठ्या अधिकार असलेल्या तसेच “कडाडली निरंजनी जेव्हा, मुक्ताई गुप्त झाली तेव्हा” या संत निळोबाराय यांच्या लिखित अभंग वाणीनुसार संत मुक्ताई या आदिशक्ती असल्याचे (ज्या नंदोपगृही जन्मुन बाल कृष्णाच्या अदलाबदलीत दुष्ट कंस राजाच्या हातातून निसटून कडकडून विजेच्या रुपात विलीन झाल्या होत्या) तत्कालीन असंख्य संत मंडळीचे दाखले आहेत.अशा या मुक्ताई साहेबांचा जन्मदिन सुद्धा अश्विन शु.प्रतिपदा (घटस्थापना) याच दिनी असल्याने नवरात्रीच्या पहिल्या माळेचे संत मुक्ताई  साहेबांचा ७४६ वा जन्मसोहळ्याचे औचित्य साधून तापी पूर्णा परिसर श्री स्वामी समर्थ सेवेकरी परिवारातर्फे हजारोंच्या संख्येत उपस्थित राहून सकाळी १०:३० ते दुपारी १ वाजेच्या दरम्यान मोठ्या उत्साहात श्री दुर्गा सप्तशती पारायण , संत मुक्ताई विजय ग्रंथ पारायण सोहळा संपन्न होत आई साहेबांच्या जन्मोत्सव ठीक दु.१२ वाजता अध्याय दरम्यान पुष्पवृष्टी व नाम गजर करून आई साहेब मुक्ताई यांचा जन्मोत्सव सोहळा साजरा करण्यात आला.
_________________________________
पारायण सोहळ्याने आले मुक्ताई मंदिर परिसरात नवचैतन्य :

आई साहेब मुक्ताई यांचा जन्मोत्सव साजरा करण्यासाठी प्रत्येक कुटुंबातील हजारो महिला घरच्या घटस्थापना , व भगवती च्या आगमनाच्या कामांची लगभग असताना देखील दिंडोरी प्रणित श्री स्वामी समर्थ सेवा मार्गाचे मार्गदर्शक परम पूज्य गुरुमाऊली श्री अण्णासाहेब मोरे यांच्या मार्गदर्शनाखाली सेवकरी परिवारातर्फे केलेल्या एका आवाहनात हजर झाल्या होत्या. मोठ्या उत्साहात येथे पारायण सोहळा पार पडला. संत मुक्ताई च्या जन्मोत्सव अध्यायात पुष्प वृष्टी करताना भाविकांचे आनंदाश्रू आणि आई साहेब मुक्ताई यांचा प्रफुल्लित चेहरा तसेच भक्तिमय वातावरण नवचैतन्याचे आनंदाचे झरे वाहताना येथे दिसत होते. यावेळी संत मुक्ताई संस्थान चे अध्यक्ष ॲड रविंद्र भैय्यासाहेब पाटील, केंद्रीय क्रिडा व युवक कल्याण राज्यमंत्री रक्षाताई खडसे, काँग्रेस ओबीसी सेल उप प्रदेश अध्यक्ष डॉ जगदीश पाटील, शिवसेना महिला आघाडी रावेर लोकसभा संपर्क प्रमुख संजनाताई पाटील संत मुक्ताई पालखी सोहळा प्रमुख रवींद्र हरणे महाराज, विशाल खोले महाराज , नितीन महाराज , पंकज महाराज,दीपक महाराज, लखन महाराज, दुर्गाताई संतोष मराठे महाराज , अमोल महाराज , लिलाधर पाटोळे निवृत्ती पाटील , पुरुषोत्तम वंजारी, सुधीर कुलकर्णी, संतोष पाटील, माणिक पाटील, सुभाष पाटील ,कुणाल महाजन , अमरदीप वराडे, श्रीकांत पाटील, शिवसेना जिल्हा प्रसिद्धी प्रमुख संतोष मराठे यांच्यासह हजारो सेवेकरी महिला भगिनी व पुरुष बांधव उपस्थित होते.
_______________________________

केंद्रीय क्रिडा व युवक कल्याण राज्यमंत्री रक्षाताई खडसे यांनी देखील पारायण सोहळ्यात हजारो महिलांसह सहभागी होत पारायण सेवा रुजू केली.