पांडुरंग निघाले,संत मुक्ताबाईंच्या भेटीला !
पंढरपूर / प्रतिनिधी
श्री विठ्ठल रुक्मिणी मंदिरे समिती व श्री संत मुक्ताबाई संस्थान यांच्या संयुक्त विद्यमाने आयोजित केलेल्या श्री पांडुरंगराय पादुका पालखी सोहळ्याचे शुक्रवार दि ३१ मे रोजी श्रीक्षेत्र मुक्ताईनगरकडे प्रस्थान झाला असून याबताची माहिती श्री संत मुक्ताबाई संस्थानचे अध्यक्ष अॅड. रवींद्र भैय्यासाहेब पाटील यांनी दिली.
पांडुरंग परमात्मा पादुका पालखी सोहळा,श्रीक्षेत्र पंढरपूर ते श्रीक्षेत्र मुक्ताईनगर हा परंपरेने सुरु असलेला पालखी सोहळा श्री संत मुक्ताबाई यांच्या ७२७ व्या अंतर्धान समाधी सोहळ्यासाठी शुक्रवार दि ३१ मे रोजी सकाळी ६ वाजता श्रीक्षेत्र मुक्ताईनगरकडे प्रस्थान ठेवला आहे. श्री पांडुरंगराय पादुकांची सकाळी ६ वाजता विधीवत पुजा झाल्यानंतर मंदिर समितीच्या वतीने मानकऱ्यांचा सन्मान करण्यात आला व यानंतर या पालखी सोहळ्याने श्रीक्षेत्र मुक्ताईनगरकडे प्रस्थान ठेवले.
शुक्रवार दि ३१ रोजी सकाळी ९ वाजता करमाळा, दुपारी १ वाजता अहमदनगर, सायंकाळी ४ वाजता नेवासा फाटा मार्गे सायकाळी ७ वाजता गारखेडा छत्रपती संभाजीनगर येथील श्री गजानन महाराज मंदिरात मुक्कामी पोहोचेल.
शनिवार दि. १ जून रोजी सकाळी सिल्लोड, दुपारी जामनेर येथे संत नामदेव महाराज पादुका भेट सोहळा, नैवेद्य व भोजन
घेऊन सायंकाळी कुऱ्हा पानाचे ता.भुसावळ मार्गे सायंकाळी ५ वाजता श्री विठ्ठल मंदिर, भुसावळ येथे पोहोचेल. येथे संत निवृत्तीनाथ व श्री पांडुरंगराय पादुका भेटीचा सोहळा होईल तर पंढरपूरहुन निघालेल्या संत नामदेव महाराजांच्या पादुका मुक्ताईनगर मुक्कामी पोहोचतील.
कोथळी ते श्रीक्षेत्र मुक्ताईनंगर दिंडी मिरवणूक
श्रीक्षेत्र कोथळी येथे रविवार दि २ रोजी श्री संत मुक्ताबाई अंतर्धान समाधी सोहळा असून या सोहळ्यासाठी श्री पांडुरंगराय पादुका पालखी सोहळा पोहोचेल. संत मुक्ताबाई अंतर्धान समाधी सोहळ्याच्यानिमित्ताने कीर्तनाची सेवा संत नामदेव महाराजांचे वंशज ह.भ.प. केशवदास नामदास यांची होईल तर raatri संत निवृत्तीनाथ संस्थानचे विश्वस्त ह.भ.प. जयंत महाराज गोसावी यांची कीर्तनाची सेवा होईल. सोमवार दि. ३ जून रोजी एकादशी निमित्त श्रीक्षेत्र कोथळी ते श्रीक्षेत्र मुक्ताईनगर दिंडी मिरवणुक होईल. त्यानंतर हा सोहळा श्रीक्षेत्र मुक्ताईनगर येथे मुक्कामी विसावेल.
मंगळवार दि ४ जून रोजी सकाळी ९ ते दुपारी १२ द्वादश पारणे सोहळा होईल आणि त्यानंतर श्री पांडुरंगराय पादुका पालखी सोहळ्याचा परतीचा प्रवास सुरु होईल. मलकापूर, मोताळा, बुलढाणा मार्गे हा सोहळा श्रीक्षेत्र चिखली येथील श्री रेणुका माता मंदिरात मुक्कामी पोहोचेल. बुधवार दि. ५ जून रोजी देउळगांवराजा, जालना, अंबड, तर गेवराई मार्गे बीड मुक्कामी पोहोचेल. व बीड येथील श्री हनुमान मंदिरात पालखी सोहळ्याचा मुक्काम आहे. गुरुवार दि. ६ जून रोजी कुंतलगीरी फाटा, वाशी, बार्शी येथील भगवंत मंदिर, कुडुवाडी मार्गे सायंकाळी ६ वाजता हा सोहळा श्रीक्षेत्र पंढरपूर येथे पोहोचेल.
पंढरपूर येथून पालखी सोहळा प्रस्तान प्रसंगी संत मुक्ताबाई संस्थानचे अध्यक्ष ऍड रविंद्र भैय्यासाहेब पाटील व इतर विश्वस्त,संत मुक्ताई पालखी सोहळा प्रमुख रवींद्र महाराज हरणे, पांडुरंग परमात्मा पादुका पालखी सोहळा प्रमुख सूर्यकांत भिसे, असंख्य वारकरी भाविक आदींची उपस्थिती होती.
