धक्कादायक : महिलेचा खून करून एका पिशवीत कोंबून पुलाखाली टाकले ! 

मुक्ताईनगर :  मुक्ताईनगर तालुक्यातील कुंड गावाजवळील पूर्णा नदी पुलावर  एका अनोळखी महिलेची अतिशय क्रूर पद्धतीने हत्या करून मृतदेह पिशवीत बांधून फेकण्यात आल्याची धक्कादायक घटना उघडकीस आली असून महिलेच्या खुनाची बातमी पसरताच परिसर हादरला असून एकच खळबळ उडाली आहे.

         मुक्ताईनगर तालुक्यातील कुंड गावाजवळ मुक्ताईनगर ते बऱ्हाणपूर महामार्गवर असणाऱ्या पूर्णा नदी पात्राच्या पुलाच्या खालील बाजूस आज सकाळी एका महिलेचा मृतदेह आढळून आल्याने परिसरात प्रचंड खळबळ उडालेली असून अतिशय क्रूरपणे हत्या करुन त्या महिलेचा मृतदेह हा जाड (कृषी संबंधीत कंपनीचा शिक्का असलेल्या) प्लॅस्टीकच्या कॅरीबॅग्जमध्ये भरून तिथे टाकण्यात आले असून डोक्याला जबर मार लागला असल्याची प्राथमिक माहिती पोलिस सूत्रांकडून देण्यात आली आहे.

       संबंधीत महिलेची ओळख पटली नसून तिचे वय साधारणपणे ४० ते ४५ वर्षाच्या दरम्यान असल्याचा प्राथमिक अंदाज वर्तविण्यात आला आहे. पोलिसांना या घटनेची माहिती मिळताच त्यांनी घटनास्थळी धाव घेतली. पुलाच्या खालील बाजूस असलेला मृतदेह हा वर काढण्याचे प्रयत्न सुरू असून या प्रकरणी पोलिसांनी पंचनाम्याची प्रक्रिया सुरू केली आहे. मृतदेह उपजिल्हा रुग्णालय येथे नेण्यात आला आहे.